बर्ष ८ / पूर्णाङक ८

Content on this page requires a newer version of Adobe Flash Player.

Get Adobe Flash player

सम्पादकीय:

सदा सुन्दर जीवनको पक्षमा

 

सधैँ सधैँ घुमिरहेको पृथ्वी युगौँदेखि जीवन नै हिँडिरहेछ, युगौँदेखि बगिरहेको पानी सरगममा जीवन गुनगुनाइरहेछ; जीवभित्रको तेज पनि जीवन नै धड्किरहेछ; हामीभित्रको प्राणवायु पनि  जीवन नै जपिरहेछ, सारा ब्रह्माण्ड नै अँगालेर आकाश पनि जीवनकै स्पेस झलमलाइरहेछ । आखिर, पाञ्चभौतिक जीवनको सत्य स्वरूप पृथ्वी, जल, तेज, वायु अनि आकाश सबै सबै सदा जीवनकै पक्षका आदिम साक्ष्य हुन् । हो, उडिरहेको बादल पनि बदलिँदो रङ र आकारमा जीवन नै त बुनिरहेछ; फक्रिरहेको फूल पनि जीवन लहराइरहेछ ; उडिरहेको चरा, प्रथम पाइला सारिरहेको बालक सबै सबै जीवन नै बोलिरहेछन्... र यत्तिखेर पृष्ठभूमिमै सही हार्नु र जित्नुभन्दा पर कसैको यो कलम पनि जीवन नै लेखिरहेछ । तर, कतै उड्दाउड्दै बादलले पनि बिचैमा बर्सिनु पर्ला, पानीले पनि बग्दाबग्दै पहाड उभिँदा त्यहीँबाट मोडिनु पर्ला, फूल पनि नफक्रिँदै जरैमा किरा लागेर यसै झर्नु पर्ला, बालकले पनि प्रथम पाइला सार्दानसार्दै धरती नै काँपेर लड्नु पर्ला ! फेरि पनि सारा अँध्याराहरूभन्दा पर अर्थात् पाउनु र गुमाउनुको सारा चक्करभन्दा पर अन्ततः उही सुन्दर जीवनकै पक्षमा नेपाली कलासाहित्य डट कम प्रतिष्ठानद्वारा विशिष्ट नेपाली कलासाहित्यलाई विश्वपरिवेशमा पुर्याउने र चिनाउने आफ्नो १५ वर्षे रोडम्यापबमोजिम नै निरन्तर लड्दै-पड्दै, उही आत्माको सितार जस्तो जिन्दगीमा ठोक्करको सङ्गीतमा पनि पुलकित हुँदै पीडाकै उत्सवमा गर्वबोधको एउटा दस्तावेज स्वरूप कला, साहित्य, सङगीत सम्बद्ध विशुद्ध ई-पत्रिका www.nepalikalasahitya.com ( www.nepaliartnliterature.com) को यो आठौँ अङ्क फेरि पनि अङ्ग्रेजी नेपाली दुवै भर्सनसहित विश्वलोकलाई नै सप्रेम अर्पण गरिएको छ ।

 

हो, हामी भौतिक उन्नति लगायत कलासाहित्यको सन्दर्भमा पनि सीमान्तकृत पीडा झेलिरहेकै छौँ । यसर्थमा नै विशिष्ट रचनाहरूको सङ्कलन, अनुवाद, प्रकाशन; राष्ट्रिय अन्तर्राष्ट्रिय कलासाहित्य यात्रालगायत विशुद्ध साहित्यिक ई-पत्रिकाको प्रसारण गरी हाम्रा सिर्जनशील कर्महरू पनि केन्द्र वा धड्कनमै बाँचून् भन्ने हाम्रो चाहको मूर्त रूप हो नेपाली र अङ्ग्रेजी दुवै भर्सनको यो प्रस्तुति । प्रसङ्गमा यो अङ्कमा पनि कलाका विविध सन्दर्भसहित पहिले जस्तै नेपाली कलासाहित्य डट कम प्रतिष्ठानको उद्देश्य र रोडम्यापबमोजिम प्रतिष्ठानद्वारा नै तयार गरी छपाइमा समेत प्रकाशन गरिएको ‘सगरमाथाको नृत्यमग्न आत्मा’ [Dancing Soul of Mount Everest] शीर्षकको आधुनिक नेपाली कविताको सिङ्गो विशेष ग्रन्थ नेपाली अङ्ग्रेजी दुवै भाषामा प्रस्तुत गरिएको छ । हामी विश्वस्त छौँ कि प्रस्तुत विशेष सिर्जन सन्दर्भहरू सबै सबै कलाको आत्मसत्यगत सौन्दर्यसहित सुन्दर जीवनकै पक्षमा आवद्ध मोहनी दस्ताबेज हुन् ।

 

अन्त्यमा सुन्दर जीवनकै पक्षमा हाम्रो पुनीत कार्यका लागि प्रत्यक्ष अप्रत्यक्ष सहयोग गर्नुहुने सम्पूर्ण कलमवीरहरू, श्रमवीरहरू र दानवीरहरूप्रति आभार प्रकट गर्दै जीवन्तता र निरन्तरताका लागि हार्दिक सहयोगको सदैव स्वागत गर्दछौँ ।

 

जरुर सुन्दर जीवनको पक्षमा अर्को अङ्क पुनः हाम्रो भेटको सौभाग्य बन्ने नै छ...

 

— मोमिला

 

 

 









अतिथि चित्रकार

सङ्गीत र कविता वाचन

मूर्तिकला

हाम्रा गतिविधिहरू

फोटो ग्यालरी

हाम्रा सम्मान र पुरस्कारको प्रोफाइल