नेपाली कलासाहित्य डट कम प्रतिष्ठान

कविता:


केशव सिग्देल

घामको रङ्ग

मेरी छोरी आफ्नो कल्पना रङ्गाउन व्यस्त छिन्
उनका औँलाहरू
कार्डबोर्ड पेपरमा बनाइएका चित्रहरूमा
अनवरत सल्बलाइरहेछन्

‘घामको रङ्ग कस्तो हुन्छ ?’ उनी गुनगुन गर्छिन्
पहेँलो, सुन्तला वा बैजनी रातो !
खोई कसलाई थाहा होला, घामको रङ्ग ?
उनी पेन्सिल समाउँछिन् र चित्रहरूमा रङ्ग भर्नुअघि
त्यसलाई तिखार्न खोज्छिन्
तर, पेन्सिलको टुप्पो बारबम्बार भाँचिन्छ
र उनको धैर्य टुट्दै जान्छ

केही झिँजिएर, केही द्विविधामा
उनी टाउको उठाउँछिन् र बिस्तारै दाहिनेतिर मोडेर
मलाई छक्क परेझैँ हेर्छिन्
उनका आँखाहरू स्वयं बोलिरहेछन्
अहिले उनी मेरा बारे के सोच्छिन् भनेर
तर, म के गरौँ...!
घामको रङ्ग सचेत थाहा पाउने गरी
मैले कहिल्यै घाम रङ्गाएको छैन..
मैले कहिल्यै त्यसलाई महसुस गर्न पाएको छैन...
कहिलेकाहीँ घामको असह्य ताप अथवा त्यसको अनुपस्थिति पनि
मलाई नरमाइलो लाग्ने गर्छ
तर रङ्ग ! ? के घामको पनि कुनै रङ्ग हुन्छ र !
मेरी सानी छोरीसँग घाम मुस्कुराउँछ
त्यो मुस्कानको रङ्ग म कसरी भनूँ

बहिर पानी दर्किरहेछ
भित्र मेरो चेतना क्षय भएर बनिरहेछ खिन्नताको तलाउ !
जहाँ परावर्तित छ घामको प्रतिच्छायाँ
तलाउमा देखिने घामको रङ्ग कस्तो हुन्छ ?
मेरो सोचाइको रङ्ग जस्तो छ, सायद !

छोरीलाई म यत्ति भन्छु—
प्रिय, आफ्नै कल्पनाको घाम बनाऊ !







प्रकाशक :
नेपाली कलासाहित्य डट कम प्रतिष्ठान

विशिष्ट सल्लाहकार :
एस्पी कोइराला

सल्लाहकार :
उमेश श्रेष्ठ
मोहनबहादुर कायस्थ
राधेश्याम लेकाली
योगराज गौतम
डा. हरिप्रसाद (मानसाग्नि)
डा. बद्री पोख्रेल
योगेन्द्र कुमार कार्की
राजेन्द्र शलभ
कपिलदेव थापा
समीर जंग शाह
सल्लाहकार सम्पादक :
राजेश्वर कार्की

प्रधान सम्पादक :
मोमिला जोशी

अनुवाद-सिर्जना :
महेश पौड्याल 'प्रारम्भ'
कुमार नगरकोटी
सुरेश हाचेकाली
केशव सिग्देल


वेबसाइट डेभलपमेन्ट समूह:
शैलेन्द्र अधिकारी
सुधीर श्रेष्ठ


वेबसाइट डिजाईन:
मदन कुमार भुजु