नेपाली कलासाहित्य डट कम प्रतिष्ठान

कविता:


मनु मन्जिल

यो सहर कसको हो ?

मैले, नआऊ—
सहरमा धेरै दुःखहरु छन् भनेँ
यहाँ पाइलैपिच्छे सडकहरु बिझ्छन् भनेँ ।
खेल्नको निम्ति मैदान, सोच्नका निम्ति एकान्त
नभएको सहर
जीवनप्रति अनुदार छ भनेँ ।
न गाउँको झैँ सबेरै गीत गाउने रुखहरु
न सुकिलो दह र ऐना
न भेटेपिच्छे खबर सोध्ने र मुस्काउने मानिसहरु ।

सहर—
बरु सबेरै काँधमा कागहरु उचालेर चिच्याउँछ भनेँ
शुभ मुहूर्तमा कुकुरहरु दौडाउँछ
र दिनको सुरुआत गर्छ भनेँ
दिनभर प्रताडनाहरु खाँदेर
एम्बुलेन्सहरु कुदाउँछ
र जब रात पर्छ, अर्ध–निद्रामा
कविता लेख्ने सुरसार गर्छ भनेँ ।

मैले, नआऊ—
सहरमा धेरै व्यथाहरु छन् भनेँ
सबै कुरा अस्पष्ट,
केवल क्रूरतामात्रै प्रस्ट देखिन्छ भनेँ
बेरोजगारहरुको लाम
सहरदेख कल्पनाको किनारासम्म पुगेको
सत्य पनि भनेँ
आँसुको यौटा गङ्गा
लगभग प्रत्येक कोठाको अँध्यारामा
चुपचाप बग्छ र त्यहीँ सकिन्छ पनि भनेँ ।
घाम साँझ नपर्दै
पर्खालहरुबाट ओइलाएर झर्ने कुराहरु गरेँ
आँखाहरु निराशाले भरिएका कुराहरु गरेँ
र यो पनि भनेँ –
सहर भीडले बोल्छ र केही बुझिँदैन
सहर हल्ला गर्छ
र सत्यको स्वर फैलन दिँदैन ।
प्रेमको लास
फोहरका कन्टेनरहरुमा भेटिन्छ पनि भनेँ
मान्छेको छातीको मरुभूमि
टाढैबाट देखिन्छ पनि भनेँ ।

तर यति धेरै भनिसकेपछि पनि पो
तिमी त आयौ र भन्यौ–
‘म अब सहरमै बस्छु ।’
किन ? के सहरमा मैले नदेखेको
उज्यालो कतै छ ?
मैले थाहा नपाएको सुखको कुनै रहस्य छ ?
छ, पक्का छ
नत्र निसास्सिएर म निक्लनै लागेको बेला
तिमी किन आउँथ्यौ र भन्थ्यौ–
‘म अब सहरमै बस्छु ।’

कि सहर तिमीझैँ रातमा घाम देख्नेहरुको हो
सहर लिदीको थुप्रोमा घोडा खोज्नेहरुको हो
मित्र आऊ, म उठेँ, गएँ,
यो सहर तिम्रो हो ।

(जर्मन कवि हान्स उलरिख त्राइखेलको ‘यो सहर कसको हो?’ शीर्षक कविताको प्रत्युत्तर)







प्रकाशक :
नेपाली कलासाहित्य डट कम प्रतिष्ठान

विशिष्ट सल्लाहकार :
एस्पी कोइराला

सल्लाहकार :
उमेश श्रेष्ठ
मोहनबहादुर कायस्थ
राधेश्याम लेकाली
योगराज गौतम
डा. हरिप्रसाद (मानसाग्नि)
डा. बद्री पोख्रेल
योगेन्द्र कुमार कार्की
राजेन्द्र शलभ
कपिलदेव थापा
समीर जंग शाह
सल्लाहकार सम्पादक :
राजेश्वर कार्की

प्रधान सम्पादक :
मोमिला जोशी

अनुवाद-सिर्जना :
महेश पौड्याल 'प्रारम्भ'
कुमार नगरकोटी
सुरेश हाचेकाली
केशव सिग्देल


वेबसाइट डेभलपमेन्ट समूह:
शैलेन्द्र अधिकारी
सुधीर श्रेष्ठ


वेबसाइट डिजाईन:
मदन कुमार भुजु