विश्वसाहित्य:
काउ होङ पो
आँसु रोप्ने बालक (कविता)
जियाङ चुआन उपनामअन्तर्गत पनि लेख्ने, गाओ होङ्बो एक कवि र बाल साहित्यका लेखक हुन् । आफ्नो लेखनको अतिरिक्त उहाँले चिनियाँ लेखक र कविता पत्रिकाहरूसहित धेरै साहित्यिक प्रकाशनहरूको सम्पादक वा प्रमुख सम्पादकको रूपमा सेवा गर्नुभएको छ। सन् १९७१ मा लेख्न थालेदेखि उहाँले बाल कविताका एक दर्जनभन्दा बढी सङ्ग्रह, तीसभन्दा बढी निबन्ध सङ्ग्रह र आलोचनाका चार खण्डहरू प्रकाशित गरिसक्नुभएको छ । उहाँ बाल साहित्यका लागि धेरै घरेलु पुरस्कारहरू, साथै राष्ट्रिय पुस्तक पुरस्कार, बिंग जिन पुरस्कार, र चाइना चिल्ड्रेन्स प्रेस "गोल्डेन लेखक" पुरस्कार प्राप्तकर्ता हुनुहुन्छ।
म आमाको हातमा आँसु रोप्छु
र उहाँको हातहरूबाट
बिरुवाझैं उम्रिन्छन् चिडियाखानाको टिकट
र त म अहिले बाँदरहरूसँग गफ लगाइरहेको छु
र खैरा भालुहरूलाई अभिवादन गरिरहेछु ।
म आँसु रोप्छु
हजुरबुवाको दाह्रीमा
र उहाँको दाह्रीबाट
उम्रिन्छ एउटा बरको रुख
र त म अहिले भारद्ववाज र सारिका चराहरूको
गीत र चिरविर आवाज सुनिरहेछु
म आँसु रोप्छु
बाबाको टेबुलमा,
र उहाँको टेबुलबाट
निस्कन्छन् कमिक्सका पुस्तकहरू
र त म अहिले ग्रिसेली मिथकको साइक्लपसँग लडिरहेछु
र बाबासँगै धनको टापु खोजिरहेछु ।
मलाई लाग्छ
म बादल हुँ
जसले आँसु बर्साउँछ ।
साँच्चै, कसैले थाहा पाउन्न
जब म रोइरहेकी हुन्छु
म मनमनै सुटुक्क मुस्कुराउँछु ।
अनुवादः केशव सिग्देल
