नेपाली कलासाहित्य डट कम प्रतिष्ठान

कविता:


राजेश्वर कार्की

बुरान

एकादेशको कथाजस्तो पहिले पहिले
हिमालबाट पहाड, पहाडबाट मधेस
या सुखको खोजीमा एक जिल्लाबाट अर्को जिल्ला
मानिसहरू बुरान जान्थे
देशभित्रको बुरानबाट काठको बाकस त आउँदैनथे
सुन्छु, आज त—
महासागरको बिचबाटै जहाज चढेर
मेरो देशै बुरान सरिरहेछ ...
जसरी मेरो सपनाको देशभन्दा सुदूर यो आफन्तहीन कैदखानाभित्र
म जता हिँड्छु, ठीक उल्टो दिशातिर बुरान हिँड्छन् बादलहरू

सायद, महासागरमा कुनै अडेसाहरू नहोलान्
कोही आफन्तहरू नहोलान्
हिँड्दा हिँड्दै आँधीहुरीले यात्रा नै दिशाभ्रम गरिदेलान्
फेरि पनि आफ्नो भन्ने जहाजलाई नै भागबण्डा गर्दै छन् रे !
सिङ्गो जहाज हिँड्दा त पानी उल्टै बगिदिन्छ
टुक्रिएको जहाज त अवश्य सागरले नै निलिदेलान्...
जसरी आफ्नोपनको सुगन्धहीन यो सुदूर कैदखानाभित्र मलाई छाडी
मेरा सपनासँगै अग्लिएको यो भीमकाय पर्खाल नाघेर उहिल्यै बुरान हिँडिसकेका छन्
मबाट विच्छेद भएका मेरा प्यारा खुसीहरू

म बुरान हिँड्दा त
मेरो सपनाको गाउँलाई कालो टीका लगाइदिएरै हिँडेथेँ...

हिँड्ने बेला
गाउँमा रुवाबासी चलेथ्यो
थाहा छ, त्यहाँ बस्नेहरू पनि बुरान जाने सपना देख्थे
र बुरान जाने वर्ग मजस्तै उत्पीडित र शोषित हुन्थे
एक दिन हाम्रो युग आउने छ भनी चुपचाप शोषण सहन्थे

सबैलाई थाहा छ
घामले पनि हाम्रो भागमा उज्यालोजति ओझेल पारिदिन्थे
र अँध्योरोमा हिँड्दा ठेस लागेर धेरै चोटि रगताम्मे भएको छु
बर्सात्ले पनि वृष्टिछायाँ हामीजस्तैको भागमा पारिदिन्थे
र र्चचरी चर्किएको बाँझो खेतमा उभिएर धेरैचोटि आँसुको भेल बगाएको छु
गर्मीको प्रिय बतास पनि हामीबाट मुख मोडेर हिँड्थे
र तातो हावाको अँगालोमा निसास्सिएर धेरै चोटि होस गुमाएको छु
यसरी घामजूनको लुकामारीमा मनपर्दो न्यानो र शीतलताजति
सधैँ हाम्रो भागबाट छलिएकै हुन्थे

त्यो बेलाको मेरो बुरान
सामन्ती चेतनाविरुद्धको विद्रोह थियो
तर, हिँड्दा—
देशलाई त कालो टीका लगाइदिनै बिर्सेछु !

सुन्छु, आज—
महासागरको बिचबाटै जहाज चढेर
मेरो देशै बुरान सरिरहेछ ...

जसरी मेरो सपनाको देशभन्दा सुदूर यो आफन्तहीन कैदभूमिभित्र
म जता हिँड्छु, ठीक उल्टो दिशातिर बुरान हिँड्छन् बादलका झुन्डहरू
जसरी जहाज जता हिँडे पनि उल्टो दिशातिर बुरान हिँड्छन् पानीका धारहरू
जसरी म मेरो देशबाट बुरान हिँड्दा नै ठीक उल्टो दिशातिर बुरान हिँडेछन्
मबाट विच्छेद भएका मेरा प्यारा सपनाहरू
सायद, अब देशभरिका रूखहरू काठको बाकस बन्न अभिशप्त छन् !

बुरानः थारु भषामा बसाइँ सर्नु







प्रकाशक :
नेपाली कलासाहित्य डट कम प्रतिष्ठान

विशिष्ट सल्लाहकार :
एस्पी कोइराला

सल्लाहकार :
उमेश श्रेष्ठ
मोहनबहादुर कायस्थ
राधेश्याम लेकाली
योगराज गौतम
डा. हरिप्रसाद (मानसाग्नि)
डा. बद्री पोख्रेल
योगेन्द्र कुमार कार्की
राजेन्द्र शलभ
कपिलदेव थापा
समीर जंग शाह
सल्लाहकार सम्पादक :
राजेश्वर कार्की

प्रधान सम्पादक :
मोमिला जोशी

अनुवाद-सिर्जना :
महेश पौड्याल 'प्रारम्भ'
कुमार नगरकोटी
सुरेश हाचेकाली
केशव सिग्देल


वेबसाइट डेभलपमेन्ट समूह:
शैलेन्द्र अधिकारी
सुधीर श्रेष्ठ


वेबसाइट डिजाईन:
मदन कुमार भुजु