नेपाली कलासाहित्य डट कम प्रतिष्ठान

कविता:


उषा शेरचन

अनाम अनाम शहीद बनिदिन्छन् तिनीहरु

(१)

सफलताका थुप्रै थुप्रै कामना बोकाएर
शान्तिका थुप्रै थुपै सन्देश लदाएर
— हरेक समारोहमा
— हरेक उत्सवमा
— हरेक मन्दिरमा

करतलध्वनिको गुञ्जाइसँगै
वैदिक ऋचाका उच्चारणसँगै
मन्दिरका पवित्र घण्टाका आवाजसँगै
अक्कासिँदै अक्कासिँदै उडेका
—बिचरा परेवाका जोडीहरुलाई
बतास्सिँदै बतास्सिँदै गएका
—विचरा परेवाका जोडीहरुलाई

के थाह ? कुने पनि बेला
— कतै खेतका
— कतै पाखामा
— कतै आलीमा
— कतै डालीमा
बन्दुकको गोलीले छाती नै छेडिन सक्छ भनेर
गुलेलीको मटयाङग्राले टाउकै फुट्न सक्छ भनेर
धनुषबाट छुटेको शरले पेटै रोपिन सक्छ भनेर

(२)

परेवाका लागि गुँड नभएका
गुँडका लागि परेवा भएका
उड्नका लागि पखेटा भएका
पखेटाका लागि उड्न परेका
ती परेवाका जोडीहरु
फर्केर पो के । नफर्केर पो के ।
मरेर पो के । नमरेर पो के ।।

तिनीहरुका शिकारमा कुनै जुलुस निस्कनेछैन
तिनीहरुका विवशतामा कुनै विद्रोह हरनेछैन
तिनीहरुका मृत्युमा कुनै आवाज उठ्नेछैन
तिनीहरुका अन्त्येष्टिमा कसैले दुईथोपा आँसु झार्नेछैनन्
तिनीहरुका पुण्यस्मृतिमा कसैले श्रद्धाञ्जलि अर्पनेछैनन्

यहाँ कुनै ब्यास छैन
— तिनीहरुका महाभारत लेखिदिने
यहाँ कुनै वाल्मीकि छैन
— तिनीहरुका रामायण लेखिदिने
यहाँ कुनै होमर छैन
— तिनीहरुका ओडिसी र इलिएड लेखिदिने

चुपचाप चुपचाप मृत्यु स्वीकार्छन् । तिनीहरु
अनाम अनाम शहीद बनिदिन्छन् । तिनीहरु







प्रकाशक :
नेपाली कलासाहित्य डट कम प्रतिष्ठान

विशिष्ट सल्लाहकार :
एस्पी कोइराला

सल्लाहकार :
उमेश श्रेष्ठ
मोहनबहादुर कायस्थ
राधेश्याम लेकाली
योगराज गौतम
डा. हरिप्रसाद (मानसाग्नि)
डा. बद्री पोख्रेल
योगेन्द्र कुमार कार्की
राजेन्द्र शलभ
कपिलदेव थापा
समीर जंग शाह
सल्लाहकार सम्पादक :
राजेश्वर कार्की

प्रधान सम्पादक :
मोमिला जोशी

अनुवाद-सिर्जना :
महेश पौड्याल 'प्रारम्भ'
कुमार नगरकोटी
सुरेश हाचेकाली
केशव सिग्देल


वेबसाइट डेभलपर :
शैलेन्द्र अधिकारी
सामाजिक सञ्जाल :