कविता:
श्रीओम रोदन
यात्रामा
हिँड्न त धेरैले हिँडे होलान्
यही बाटो भएर यात्रामा
धूलोमा देखिएका जुत्ताका छापहरु
यस्तै भनिरहेका थिए
ठूलो पहाडको
एकहाते बाटोमा
पदछापहरु बिग्रिएका थिए
म पनि आफ्नो पदछाप
बिगार्नकै लागि छोडिरहेको थिएं
अगाडि हिंड्ने साथी भन्नुहुन्थ्यो
नहेर्नु अन्त कतै
टेक्दै आउनु मेरै पाइताला
तलमाथि हेर्नु भयो भने
नदी ,पहाड ,चट्टान सबै
डरलाग्दा देखिने छन्
थाकेको यात्रालाई
अझ बढी तर्साउने छ
तर
कसैको पाइताला भएर मैले
कुन गाउंको यात्रा गर्नु ?
कुन घरको कथा बुझ्नु ?
