नेपाली कलासाहित्य डट कम प्रतिष्ठान

कविता:


मौन आवाज

ढुंगा

अक्सर -
ऊ रंगहरुको कुरा गर्थ्यो !

फूल - पात र / हरियालीको कुरा गर्थ्यो !

ऊ भन्थ्यो -
सधैं भन्थ्यो -
यो जिन्दगी सुन्दर दृश्य हो !

भन्थ्यो -
यो जिन्दगी सुमधुर संगीत हो !

भन्थ्यो -
यो जिन्दगी प्रेम र / सद्भावको गीत हो !

हिँड्दा सुस्तरी हिँड्थ्यो
बोल्दा सुस्तरी बोल्थ्यो -
भन्थ्यो -
सख्त हुनु ढुंगा हुनु हो !

ऊ अक्सर हरियो घाँसमा पल्टिएर निदाउँथ्यो -
आकाशसँग कुरा गर्थ्यो -
बादल -
बतास -
घाम -
पानी र माटोसँग कुरा गर्थ्यो !

भन्थ्यो -
यो जिन्दगी प्रकृति हो !

भन्थ्यो -
यो जिन्दगी माटो हो !

भन्थ्यो -
यो जिन्दगी पानी हो -
घाम हो -
बतास हो -
बादल हो -
र / इन्द्रेणी हो !

ऊ पहाडलाई निरन्तर भन्थ्यो -
आँधीको बाटो नछेक !

ऊ बारम्बार भन्थ्यो -
आँधी क्षणिक हुन्छ -
आवेग क्षणिक हुन्छ !

नदीलाई किनारा देखाउँथ्यो -
र / भन्थ्यो बिछोड पीडादायी हुन्छ !

ऊ बगरलाई हेर्थ्यो -
र / भन्थ्यो -
यो जिन्दगी एक्लोपन होइन !

भन्थ्यो -
यो जिन्दगी समुह हो -
समुदाय हो !

भन्थ्यो -
यो जिन्दगी घर हो - परिवार हो !

ऊ कहिलेकाहीं विगत सम्झेर
रुन्थ्यो -
र / भन्थ्यो आँशु भरिएको आँखा सजीव हुन्छ !

ऊ कोमल थियो -
ऊ मान्छेको मात्रै होइन -
ढुंगाको पनि मन नदुखोस् भन्थो !

किनकि -
मान्छे हुनुअघि ऊ ढुंगा थियो !

बारम्बार टुक्रिएर - चोइटिएर ऊ मान्छे बनेको थियो !







प्रकाशक :
नेपाली कलासाहित्य डट कम प्रतिष्ठान

विशिष्ट सल्लाहकार :
एस्पी कोइराला

सल्लाहकार :
उमेश श्रेष्ठ
मोहनबहादुर कायस्थ
राधेश्याम लेकाली
योगराज गौतम
डा. हरिप्रसाद (मानसाग्नि)
डा. बद्री पोख्रेल
योगेन्द्र कुमार कार्की
राजेन्द्र शलभ
कपिलदेव थापा
समीर जंग शाह
सल्लाहकार सम्पादक :
राजेश्वर कार्की

प्रधान सम्पादक :
मोमिला जोशी

अनुवाद-सिर्जना :
महेश पौड्याल 'प्रारम्भ'
कुमार नगरकोटी
सुरेश हाचेकाली
केशव सिग्देल


वेबसाइट डेभलपर :
शैलेन्द्र अधिकारी
सामाजिक सञ्जाल :